Material honen funtsezko interesa teknologiaren arloko eduki-multzoak ikasleei zuzendutako lan-proposamen desberdinetan erlazionatzea da. Gehiegi zehazteko asmorik gabe, Arloko Garapenaren Dekretuan barne hartutako curriculumaren hainbat planteamenduri erantzuteko helburua duten eragile-multzoa bildu dugu.

Material honek argi bereizitako bi zati ditu:

Lehenengo zatian, “OINARRIZKO PROIEKTUAK” izenekoan, aurkeztuko ditugun proposamenak egiturei, operadore mekanikoei eta operadore elektrikoei buruzko lan-proiektuen ingurukoak dira. Proiektu horiek lantegi-gelako garapena errazten duten oharrak, jarduketa-jarraibideak eta argibideak dituzte lagun.

Bigarren zatian, “UNITATE DIDAKTIKOAK” izenekoan, berriz, hainbat proiektu aurkeztuko ditugu, unitate didaktikoaren egitura dutela. Horietan disziplinen arteko lotura izan dugu kezka nabarmena eta horien garapenaren barruan irakasleei bideratutako hainbat erreferentzia didaktiko eta baliabidea bildu ditugu. Izan ere, baliabide horiek, batzuetan, planteatutako proiektuei irtenbidea ematen laguntzen dute eta, besteetan, lan-metodologia egoki batean oinarritzeak garapenari dakarkion euskarria ez galtzen.

Aurkezpen hau izenburuan bertan (Teknologia eta Sormena –teknologia-proiektutik unitate didaktikora) aipatutakoa dugu. Horrek lan-proiektu batetik abiatuta unitate didaktikoen garapenerako aurrerapena egiten dugunean ematen dugun pauso esanguratsua adierazten du.

Muntaia ororen jatorria berorren irtenbidea ondorio izango duen eraikuntza-prozesu baten bidez arazo edo premia bati erantzuna ematea da. Horrenbestez, arazoaren eta irtenbidearen artean eraikitzea (proiektua) eta interpretazioa (analisia) izango ditugu; horretantxe, hain zuzen ere, izango ditugu ahalik eta eduki-multzo gehien eta, logikoa denez, hor hartuko dugu aintzat beren planteamenduan aurkezten den tipologia hirukoitza: prozedurazkoa, kontzeptuzkoa eta jarrerazkoa.

Hiru mota horiek modu orekatuan barne hartuz eta uztartuz eta ikasleengan erroreak zuzentzeko, jarrerak berriz bideratzeko, prozesuak estimulatzeko eta abarretarako berariaz eraginez, oreka pertsonala eta gizarte oreka lortzen lagunduko dieten gaitasunen garapena lortzeko parada eskainiko diegu. Aldi berean elkartasunaren, erantzukizunaren, tolerantziaren eta partehartzearen inguruko baloreez jabe daitezen erraztuko dugu. Horrezaz gain, norberaren behaketa eta ikerketa estimulatuz, autoprestakuntza eta irizpide independentzia, hain mediatizatuta dagoen gizarte honetan beharrezkoa dena, sustatuko ditugu. Hori guztia dela eta, teknologiaren arloan ikasleek egindako ikaskuntza esanguratsua izan dadin ahaleginduko gara.